Moderne askeladd. Med metalldektor og spade gjer Asle Økelsrud interessante og viktige funn av oldsaker og kulturminner. Her er han i sving på Håtveit gard på Gvarv. Detektoren gjev raskt svar om kva slags metall som skjuler seg nede i bakken. Foto: Øystein Akselberg
Med hjelp av metallsøkjar har Asle Økelsrud gjort interessante funn frå fortida i Bø og Sauherad. Neste år lagar han utstilling i samarbeid med Evju bygdetun.
Asle Økelsrud (45) er til dagleg stipendiat i økologi ved høgskulen i Bø, der han no jobbar med ei doktoravhandling. Sidan 2011 har han vore hekta på å søkje etter gjenstandar frå fortida med metalldetektor. Han har gjort viktige funn på eit ti-talls forskjellige gardar i Bø og Sauherad, men favorittområdet hans er eit jorde tilhøyrande garden Håtveit på Gvarv.
– Eg har funne over 40 gjenstandar i Bø og Sauherad som er innlevert til kulturminnevernet, seier han, og kan vise til funn frå yngre romersk jernalder, cirka år 160-375 e. Kr.
Blant dei mest interessante funna er ei korsforma spenne frå folkevandringstida (ca. 450 e. Kr.), ei likearma spenne frå merovingertid (ca. 600 e. Kr), ei Urnes-spenne frå tidleg middelalder (ca. 1050-1200 e. Kr.) og det som mest sannsynleg er ei vendemaske frå vikingtida (ca. 900 e. Kr.).
– Eg håpar også at når folk les om verksemda mi i lokalavisa vil det gje meg respons på fleire leiteområde som kan vere interessante, seier han og innrømmer at han har sett seg ut fleire gardar som er svært interessante å leite ved.