MINDRE PENGAR TIL ASFALT. Vegane i Vestfold og Telemark får lite tilskot av asfalt i året som kjem.
MINDRE PENGAR TIL ASFALT. Vegane i Vestfold og Telemark får lite tilskot av asfalt i året som kjem.

Stasjonsvegen snart ferdig

Innspurt med asfalt. Anleggsfolka som har drive arbeid i Stasjonsvegen har lagt asfalt denne veka. Det har publikum merka med manuell dirigering og kø. No blir vegen fin og brei og slett, Sudelida sudelidei. Foto: Øystein Akselberg.

Stasjonsvegen har vore eit anleggsområde i ni månader. Om to veker skal alt stå ferdig. Prislappen er på rundt 30 millionar kroner.

Offisiell opning av nye Stasjonsvegen (Fylkesveg 359) i Bø sentrum er tysdag 27. juni. Då kjem ”fine folk i floss” og ein ”kakse som kan klippe snor” og ”held sin takketale for den stolte kontraktør”.  Slik heiter det i songen om Ola Tveiten, men til Bø kjem avdelingsdirektør i Statens vegvesen, Tore Kaurin, fylkesordførar Sven Tore Løkslid og ordførar i Bø, Olav Kasland, som skal ta seg av opning og fine talar.

Tveito Maskin har vore hovudentreprenør for bygging av ny og oppgradert Stasjonsveg. Jobben har firmaet gjort for 12,8 millionar kroner. I tillegg har private gardeigarar investert mellom ein halv og ein million kroner på private prosjekt i tilknyting til oppgraderinga. Kommunen har også lagt i pengar for å ta sin del av det som står på kommunal grunn. Heile prosjektet er av Statens vegvesen budsjettert til 29 millionar kroner. Sidan midten av september i fjor har Tveito Maskin vore på plass med mange folk og maskiner. Mot slutten av mai toppa det seg med asfaltering av vegbana, manuell dirigering av trafikken og lange køar.