Kommuneoverlege Kristin Sekse, ordførar Siri Blichfeldt Dyrland i Midt-Telemark kommune og ordførar Bjørg Tveito Lundefaret i Nome kommune er bekymra over smittesituasjonen i regionen. I begge kommunar har det dei siste dagane blitt registrert fleire tilfelle av personar som er smitta av covid-19. Det er nå fire smittetilfelle i Midt-Telemark og tre i Nome. Alle er knytt til den store smittespreiinga i Grenland.
Mest smitte blant unge
– Smitten er nå stigande også i våre kommunar, samtidig som auken i smitte i Grenland er bekymringsfull stor. Dei som er smitta er i stor grad unge elevar, både i ungdomsskulen og vidaregåande skule. Me veit at unge bevegar seg over kommunegrenser, blant anna går mange elevar på vidaregåande skule i nabokommunar, står det i ei pressemelding frå dei tre.
– Me opplever alle at me har hatt ein lang og slitsam vinter, og at me nå gjerne vil møte kvarandre og vere sosiale. Det er lettare å møtast ute når det blir varmare i vêret, noko me også oppfordrar til, uttaler Blichfeldt Dyrland, Sekse og Tveito Lundefaret.
Likevel ber dei nå om at alle sosiale samlingar framover skjer i tråd med reglane som gjeld fordi smitten som nå breier seg i grenlandsområdet skjer i samband med ulike formar for samvær mellom folk både innan- og utandørs.
– Hald avstand og ver saman bare i mindre grupper. Sjølv om det i dag ikkje er påbod om bruk av munnbind, vil me også oppfordre til å bruke det, seier dei.
Bekymra for konsekvensar
I pressemeldinga frå dei øvste kommuneleiarane og kommuneoverlegen blir det dessutan peika på at når ungdom blir smitta, får det store konsekvensar for resten av samfunnet.
– Smitten går ikkje bare ut over den som er sjuk, men rammar òg familiemedlemmar som må vere i karantene og borte frå jobb, skule og barnehage. I tillegg må ofte klassen, kohorten og dei ein har fritidsaktivitetar med også i karantene, skriv dei tre.
Oppfordring til unge og vaksne
– Me vil oppfordre familiane til å hjelpe ungdommane sine med å avgrense sosial kontakt dei nærmaste vekene, slik at me igjen kan få kontroll med smitten, seier ordførarane.
– Me oppfordrar ungdommane til å halde ut ei stund til. Risikoen for å bli smitta når ein møtest over kommunegrensene nå, er som sagt høg. Risikoen for at det da får store konsekvensar for familie, vener, skule og aktivitetar som ein elles kunne deltatt på, er også høg, seier Blichfeldt Dyrland, Tveito Lundefaret og Sekse.
Dei understrekar at smitten dei neste vekene legg føringar for korleis resten av sommaren kan bli.
– Klarar me ikkje å få kontroll med smitten nå, risikerer me strenge tiltak utover sommaren, truleg inntil me får vaksinert dei fleste vaksne. Så følg reglane med å halde avstand og vaske hender, og ver heime viss du har luftvegssymptom. Og det er lurt å bruke munnbind.