Lene Røyneberg i Wakeboardgruppa fortel at omlag 40 deltakarar stilte til start. Forutan dei lokale, kom det utøvarar frå Hamar, Oslo og omegn, ja stort sett frå heile søraust-landet. Denne gongen var det Norgesmeisterskap for aldersbestemte klasser, i tillegg til barneshow. Det blei tevla i klassene U/14 jenter og gutar, U/18 junior damer og herrer, Master damer og herrer 30-40, og veteran damer og herrar 40+.

– Om lag halvparten av deltakarane tilhøyrer Sauherad Wakeboard, men ikkje alle er lokale. Sauherad har hovedbanen for wakeboard, dei andre klubbane har bare små kabelbanar. Me er den einaste i Noreg med eit slikt anlegg, og alle kjem difor hit for å køyre. Difor har mange også meldt seg inn i klubben, seier Røyneberg.

Mange spektakulære svev

Sauherad IL Wakeboard valde å legge NM for aldersebestemte klasser til denne helga, i samband med Telemarksveka. Vanlegvis er ikkje NM før på hausten. I september er det klart for NM for eliten.

Men om ikkje eliten tevla på Norsjø denne dagen, var det ingenting å seie på innsatsen til dei som deltok. Her var mange spektakulære svev over hopp og i lufta. Både framover og baklengs, og opp-ned. Nokre fall blei det også, det høyrer med.

Sauherad Wakeboard sitt lokale lag besto av Malin Forberg Kaasin (16), Elisabeth Røyneberg (15), Solveig Aamodt (11), Skage Ower (15), Elias Poppe (17), Haakon Aamodt (17), Knut Gravdal (17), Ignas Kazakaevicius(13) og Jarand Seljestad Flaaten (12). Sander Saga Vaalanes (12) har skadd foten, og måtte nøye seg med å vere i heia-gjengen denne gongen.

Fornøgd med innsatsen

Malin Forberg Kaasin hadde tid til ein kjapp prat mellom øktene. Ho hadde som mål å lande det ho har øva på, og var godt fornøgd etter kvalifiseringsrunden. Ho såg difor fram til finalen. Der blei ho slått av lagvenninna Elisabeth Røyneberg.

Haakon Aamodt drog heim NM-tittelen i gutanes juniorklasse, her blei Elias Poppe nummer tre og Knut Gravdal nummer fem. Også Ignas Kazakaevicius vann si klasse, u/14,

Ei som gleda seg til å kome på vatnet, var Solveig Aamodt. 11-åringen var med på barneshowet denne gong. Ho har drive med wakeboard i fire år, og synest det er kjempemoro. Særleg å ta hopp og slikt, samt køyre saman med vener.

Full fart heile sommaren

Sauherad IL Wakeboard kan smykke seg med nok eit flott arrangement, i strålande vér. Lene Røyneberg fortel at sesongen starta etter påske og held fram til det kjem sludd i oktober.

– Det er trening tirsdag og torsdag kvar veke, men i sommarferien er kabelanlegget ope kvar dag, slik at også andre kan prøve seg. Da har me ikkje eigen trening. Neste veke arrangerer me Wakeboardskule, og det er påmeldt 30 deltakarar frå åtte til 19 år. Då blir det også full fart i anlegget her, seier Røyneberg.