Etter tre vekers intens jakt på brukte hushaldningsbatteri kunne klasse 4A ved Folkestad skule juble som best i fylket. Elevane på Folkestad har samla inn 18,27 kilo per elev og havna totalt på 402 kilo innsamla batteri.

Da Bø blad besøkte batterijegerane nokre dagar før fristen, hadde dei samla inn 261 kilo. Elevane klarte nærmare 150 kilo meir før aksjonen var over.

Folkestad skule har god tradisjon på å vinne Batterijakten i Telemark. Nummer to på lista i år var Gimle skule i Fyresdal med 14,55 kilo innsamla batteri per elev.

Premien elevane får er miljøfremjande utstyr og diplom.

Miljøorganisasjonen Miljødetektivene står bak Batterijakten, som blir arrangert for 4. klasse kvart år. Det blei totalt i år samla inn 100,3 tonn brukte batteri som blir sendt til gjenvinning.