Uteområdet og parkeringsplassen ved Bø stasjon blir eit anleggsområde frå torsdag av og heilt fram til 18. desember. Det er Telemark Grunn og Betong med Kim Bergskås i spissen som har fått jobben. Kontrakten er verdt 4,66 millionar kroner + moms. Bane NOR melder at dei skal utvide parkeringsplassen ved Bø stasjon frå 44 til 86 p-plassar.
Under arbeidet blir den store parkeringsplassen stengt. Som erstatning tilbyr Bane NOR dei reisande eit parkeringsområde ved Oppheimvegen, på andre sida av jernbanesporet. Det er ikkje lov å krysse jernbanesporet, så dei reisande som parkerer her må rekne tid til å gå tilbake til stasjonen over Borgjabrua.