Tormod Hynne (36) er frå 1. april tilbake i Bø på fulltid også i jobbsamanheng. Hynne startar opp i 100 prosent stilling på Sønstebøtunet og skal arbeide med sal av profilklede til bedriftsmarknaden, som blir ei ny storsatsing for Sønstebøtunet. Det var avisa Varden som presenterte nyheita i helga.
Hynne har dei siste to åra vore tilsett i TV-produksjonsselskapet International Management Group og har også vore travreportar i NRK, TV2, TV Norge og VGTV. Før det hadde han deltidsjobben som leiar i Sentrumsringen i Bø.
– Det er ei veldig spennande satsing som skjer på Sønstebøtunet og eg gler meg til å bli med på dette, seier Hynne til Bø blad, men innrømmer også at nesten ti år med pendling til og frå Oslo og mykje helgejobbing blir slitsamt og ikkje gunstig som familiefar til to små.
Sønstebøtunet med Jan Helge Sønstebø i spissen er glad for å få Hynne med på laget og har stor tru på at profilklede til bedriftsmarknaden kjem til å bli ein viktig og stor del av framtidas omsetting.
Hynne skal også vidare ha rolla som primus motor for Telemarksveka.