Strålande påske. Med fint påskevêr kjem folk til fjells. Det gjev fleire oppdrag til Røde Kors. Foto: Hilde Eika Nesje
Mange påskeoppdrag for Røde Kors
Med fint vêr og sol heile påska har det vore stor påskeutfart i fjellet. Gvarv og Nome Røde Kors hjelpekorps har hatt vakt på Lifjell gjennom heile påskeferien og melder at det har vore mykje å gjere.
– Mange har vore ute på tur, og det har vore stor pågang av turistar på Lifjell. Med mykje folk i fjellet blir det også meir å gjere for hjelpekorpset, seier korpsleiar i Gvarv Røde Kors, Sondre Røstad.
– Me har hatt totalt 15 oppdrag der politi eller ambulanse var involvert. I tillegg har det vore nærmare 30 småskader, og det er mykje samanlikna med tidlegare år, legg Røstad til.
Han fortel at hjelpekorpsa nå går over til å ha vanleg beredskap og avsluttar vaktene sine på Lifjell i helgene for denne sesongen.