Landskappleiken 2018, Ottar Kåsa
Landskappleiken 2018, Ottar Kåsa

Ottar fekk fela med seg heim att

Ottar Kåsa vann sjølv fela han hadde laga til Seljordkappleiken på oppdrag av Johan Angre. Fela er sett opp som vandrepremie. Arkivfoto: Gro B. Røiland

Ei fele laga av Ottar Kåsa og donert til Seljordkappleiken av Johan Angre, blei med tilbake til opphavsstaden Øvre Bø etter kappleiken i Flatdal laurdag.

Den nylaga fela er sett opp som vandrepremie i hardingfele klasse A.

Fela gjekk til vinnaren av omspelet for dei tre i A-klassa med flest poeng. Dei tre blei Torgeir Straand (96 poeng), Ottar Kåsa (93 poeng) og Per Anders Buen Garnås (87 poeng), alle med adresse Bø. Den som vann omspelet fekk fyrste napp i fela. Det blei felemakar og spelemann Ottar Kåsa, som dermed kunne ta med seg fela heim att.

Tre napp må til før nokon får fela til odel og eige.

Torgeir Straand vann hardingfele klasse A på Seljordkappleiken, som i år også var fylkeskappleik. Spelemannen frå Bø briljerte med 96 av 100 poeng for slåttane Langedragen 3 og Markensmåndagen. Spelet gav han den gjeve Myllargutmedaljen i gull frå Telemark ungdomslag.

Bø markerte seg sterkt med fleire gode utøvarar og hadde dei fire beste i A-klassa. Spelemannen Lars-Ingar Meyer Fjeld blei nummer fire med 85 poeng for sitt spel.

Sunniva Langås-Røiland var einaste deltakar i hardingfele klasse C og fekk 59 poeng.

Tidlegare kongepokalvinner og fyrstepremievinnar frå Landskappleiken, Ingebjørg Bø, vann dans hardingfele klasse A med 88 poeng.