Sist torsdag var det Sandra Langkaas Søgnen, Lene Kristine Langåsdalen og Anne Fagermo som leia den blå kvelden på Kjernehuset på Gvarv.
Blå tankar
Blå kveld er kveldar med ord og musikk i blåtonar. På engelsk seier dei «I feel blue», og definisjonen på «blue» er då oftast trist eller fortvila. På norsk, og i Midt-Telemark, skal ein blå kveld romme ulike blå tankar i livet. Ein kveld i månaden har Frivilligsentralen derfor bedt folk med forskjellig bakgrunn om å dele ærlege tankar og musikk om det som kan vere utfordrande i deira kvardag. Arrangementet er gratis og ope for alle.
Utan hørsel
Dei som har vore med og arrangert Blå kveldar så langt har snakka og synge om det å miste nokon og utfordringar knytt til vår digitale kvardag.
Førre veke fortalte Sandra Langkaas Søgnen om korleis det er å miste hørsla. Lene Langåsdalen og Anne Fagermo tolka songar Sandra er glad i, men som ho ikkje lenger kan høyre. Det blei ei sterk oppleving for dei 40 frammøte på Kjernehuset.
Helse i kvart ord og tone
– Det er viktig å bruke tid på mental helse, seier dagleg leiar på Frivilligsentralen, Kristin Tolo.
– Me menneske treng å kome saman. Dei blå tankane kan kjennast lettare når me er fleire. Livet er ikkje rett fram, og det er lov å kjenne seg blå iblant. Eg er glad for at «Blå kveld» finst, og for at folk er rause og deler historiar. Eg trur det er helse i kvart ord og kvar tone, seier ho.