Eit viktig ja

Sist veke fekk rektor ved Universitetet i Søraust-Noreg (USN) tommelen opp frå styret til å gå vidare med planane om utbygging av campus Bø. Universitetet ønskjer seg og treng meir plass, og aller helst vil det ha både ny idrettshall og forskingspark i eit nybygg. Den endelege avgjersla kan få følgjer både for Gullbring kulturanlegg og den planlagte kunnskapsparken på tomta til Bø hotell, men førebels er ingen ting spikra. I styrevedtaket går ein også inn for at i den vidare planlegginga skal USN ha dialog med både Midt-Telemark kommune, det kommunale eigedomsselskapet, lokalt næringsliv og andre aktørar. Målet er at USN-styret skal ta ei endeleg avgjersle om campusutbygging før jul.