Ifølgje einingsleiar for kommunikasjon og service i Midt-Telemark kommune, Marte Midthun Lie, er dei to nye smittetilfella i Midt-Telemark knytt til ei verksemd på Notodden.

Ikkje knytt til Bø skule

– Me har god kontroll på personane frå Midt-Telemark som har blitt ramma av dette. Smittesporinga rundt dei to som er smitta er vel i gang og blir snart avslutta, seier Midthun Lie, og avkreftar dermed at dei nye smittetilfella er knytt til karantenen på Bø skule sist veke.

– Smitten er heller ikkje knytt til pensjonistbussen med koronasmitte som køyrte gjennom Telemark for nokre veker sidan, seier Midthun Lie.

Kjent sidan fredag

Ifølgje avisa Telen på Notodden opplyser kommuneoverlege på Notodden, Mie Jørgensen, at dei der er i full gang med å kartleggje kven fleire som må i karantene etter at ei verksemd i kommunen har hatt besøk av ein person som seinare har testa positivt på covid-19.

– Me er nå i gang med å kartleggje om fleire skal i karantene, seier Mie Jørgensen til Telen.

Ho understrekar at ingen busett i Notodden kommune har testa positivt på covid-19. Det var først i dag, onsdag, at kommuneoverlegen fekk vite at 10–12 personar allereie har vore i karantene nokre dagar.

– Smitten skal ha vore kjent sidan fredag. Det er ein person frå ein annan kommune som har vore på besøk i ei verksemd i Notodden og seinere fått påvist covid-19, seier Jørgensen.

Fra før har ni personar i Notodden blitt sett i karantene etter eit besøk frå andre kommunar til bordtennisklubben i Notodden. Ingen av desse ni har fått påvist smitte.

https://boblad.no/2020/09/25/fleire-klasser-ved-bo-skule-i-karantene-fredag/