Ny koronasmitte er oppdaga i Midt-Telemark. Det melder Midt-Telemark kommune i ei pressemelding onsdag kveld.
Knytt til vaksenopplæringa
Personen som har testa positivt for covid-19 er knytt til vaksenopplæringa i Midt-Telemark kommune og skulen vil halde stengt i morgon, den 12. november, slik at ein får oversikt over situasjonen.
Lærarar og elevar er bedt om å halde seg i heimekarantene til smittesporinga er kartlagt. Dei vil få beskjed dersom dei må teste seg.
Testar nærkontaktar
Barn og vaksne i same husstand som personen med positiv test er definert som nærkontaktar. Desse må vere heime frå skule og barnehage og vil bli testa umiddelbart i morgon tidleg. Svar på prøvene vil sannsynlegvis vere klart i løpet av ettermiddagen torsdag.
Ifølgje kommunen har ingen av barna symptom på covid-19 slik situasjonen er nå.
Ingen klasser i karantene
– Etter retningsliner og rettleiing frå Folkehelseinstituttet er det nå IKKJE anbefalt å ta ut klasser i karantene før det eventuelt blir påvist smitte hos elev. Midt-Telemark kommune held seg derfor til dette, heiter det i skrivet frå kommunen.
Ved endringar eller behov for ytterlegare tiltak vil dei involverte få beskjed, opplyser kommunen.
Omfattande smittesporing
– Smittesporingsjobben er omfattande og me jobbar så effektivt og godt me kan for raskast muleg å få oversikt over alle nærkontaktar, står det i pressemeldinga.
Alle involverte og aktuelle nærkontaktar av den smitta blir kontakta av kommunen.
– Me oppfordrar til å følgje med på kommunens heimesider for oppdatert informasjon. Den blir lagt ut fortløpande så snart me har oversikt, melder kommunen.