Det melder rektor Jon Helge Bergane i ei oppdatert melding til elevane tysdag kveld, etter at det vart stadfesta at ein elev ved skulen er smitta av covid-19.
– Eleven er frå ein annan kommune. Det er sett i gang smittesporing, men det vil ta tid å få oversikt over situasjonen, melder kommuneoverlege Kristin Sekse i ei pressemelding frå kommunen tysdag kveld.
Vg1-elevar i karantene
Alle elevar på vg1 blir definert som nærkontaktar til den smitta og skal gå i karantene heime. Ifølgje rektor Bergane blir dei kontakta av smitteteamet i kommunen og får beskjed om testing.
Alle husstandsmedlemmar av vg1-elevar blir sett i ventekarantene, ifølgje Sekse.
– Inntil vidare kan me ikkje teste dei som er i ventekarantene på grunn av testkapasiteten, opplyser kommuneoverlegen.
Uavklart på vg2
På grunn av uavklart kontakt med elevar på vg2, vil heile trinnet bli tilrådd å teste seg i morgon, og bare vere i karantene til dei har negativt svar på test, ifølgje kommuneoverlegen.
– Elevar på vg2 blir ikkje definert som nærkontaktar, men skal inntil vidare opptre som om dei er i karantene og derfor halde seg isolert heime. Husstandsmedlemmar av vg2-elevar skal ikkje i ventekarantene, opplyser Bergane.
Ikkje i karantene, men heime
Rektor melder at vg3-elevar og kombinasjonsklassa per nå ikkje er direkte involvert eller definert som nærkontaktar, men dei skal likevel halde seg heime i morgon inntil ny beskjed kjem.
Vg3-elevar skal ikkje i karantene eller testast, ifølgje kommuneoverlegen.
Alle som skal testast, får beskjed om tid og stad i løpet av onsdag.
https://boblad.no/2021/03/23/smitte-pa-bo-vidaregaande-skule-elevar-pa-vg1-ma-vere-heime/