Campusutvikling i Bø
UNIVERSITETET I SØRAUS-NOREG er ein av fire organisasjonar i Bø og Sauherad som gjestar denne spalta på omgang. Dei andre er Evju bygdetun, Bø Museum og Bø sokn/ Sauherad og Nes sokn.
Fagmiljøa i Bø blei delt på ulike fakultet etter samanslåinga mellom Høgskolen i Telemark og Høgskolen i Buskerud og Vestfold. Vi har brukt mykje tid på å finne fotfeste i ei anna og annleis universitetsverd. Vi har skapt nye samarbeidsliner, nye fellesskap og har fått mange nye utfordringar.
Utviklinga ber frukt og tida er komen for å utvide bygget i Bø slik at vi kan ta imot fleire studentar, skape nye prosjekt saman med kommunar og næringsliv i vår region og ikkje minst auke attraktiviteten til Midt-Telemark som stad å bu, studere og feriere.