Her har det vore gøy på landet i femti år

Frå kontoret mitt på USN har eg den finaste utsikta. Eg ser ned på plassen framfor universitetet, på den livlege aktiviteten til dei unge menneska som har studiekvardagen sin i Bø. Eg ser også banneret som heng over døra på Kroa: Gøy på landet sidan 1971. Og ein etter ein ser eg dei, studentane som opnar døra til Kroa og går inn. Eit steg som kanskje skal forandre alt, for den det gjeld.
Femti år har gått sidan Kroa i Bø vart etablert. I femti år har Kroa vore ein avgjerande stad for mange studentar. Eit definerande kulturbygg og ein viktig scene i kultur-­Noreg, men også ein stad for praksis og arbeid, ein stad for venskap og fest.