November er tung for mange: – Bare ein kort tur ut kan bety mykje nå

Store organisasjoner samarbeider nå for å gjere mørketida lysare.

– Nå er me inne i den mørkaste, og for mange tyngste, månaden i året. Da er det viktig å hugse på at bare det å kome seg ein kort tur ut, gjerne saman med andre, kan gjere mykje for både humøret og energinivået, seier Bente Lier, generalsekretær i Norsk Friluftsliv, i ei pressemelding frå fellesorganisasjonen for 18 norske frivillige friluftslivsorganisasjonar.

Saman med Kreftforeningen, Nasjonalforeningen for folkehelsen, Norske Kvinners Sanitetsforening og Den Norske Turistforening, står dei bak initiativet #sammenpåtur. 

Målet er å senke terskelen for å kome seg ut. Enten ved å invitere med seg nokon ein kjenner, eller ved å bli med på organiserte aktivitetar i nærområdet. 

Vil vise fram tilboda

– Saknar du nokon å gjere hyggelege aktivitetar saman med? I dei mange frivillige laga og foreiningane over heile Noreg finst det veldig mange fine menneske som gjerne vil ha deg med ut på tur, seier Lier.

Sjølv om organisasjonane som står bak er ulike, jobbar dei alle med å skape gode møteplassar som kan gje påfyll og meining i kvardagen, ifølgje pressemeldinga.

Gjennom året har dei i felleskap arrangert turar og aktivitetar under fanen #sammenpåtur, med mål om å nå ut til nye deltakarar. Kampanjen er ein del av Frivillighetens år 2022. På Sammenpåtur.no kan du få inspirasjon og sjå organisasjonane sine aktivitetar i tida framover. 

– Inviter nokon med ut 

Lier har også ei oppfordring til alle som synest det er vanskeleg å finne motivasjon til å kome seg ut nå i mørketida. 

– Lag turavtaler med venner og kjente. Når nokon forventar at du møter opp til noko, er det ikkje like enkelt å bli liggande på sofaen. Og ikkje minst kan ein turinvitasjon bety meir enn du trur for den som blir spurt.

– Du kan for eksempel invitere med ein kollega eller kamerat, naboen, nokon du ikkje har sett på lenge, nokon du ikkje kjenner frå før eller nokon du veit om som gjerne kunne ha trengt ein tur, turven eller oppleving utandørs, oppfordrar generalsekretæren i Norsk Friluftsliv. 

Her kjem nokre tips frå Norsk Friluftsliv til utandørs aktivitetar som kan gje etterlengta energipåfyll i den mørke månaden me har framfor oss

Fem tips som kan gjere mørketida lysare 

Utnytt dagslyset:  Har du mulegheit til å invitere nokon med på ein rusletur ut på dagtid, for eksempel i samband med lunsj eller eit møte på jobb eller skule, så gjer det.

Tenn eit bål:  Ikkje bare lyser det opp, men forsking viser at bål har ein beroligande effekt på oss. Eit varmande bål fungerer også som eit flott sosialt samlingspunkt i haustmørkret. Sjå bålreglane her. 

La appar inspirere deg:  Enten du er på utkikk etter turforslag eller vil lære noko nytt, finst det mange appar som kan motivere deg til å ta turen ut.

Ta ein tur for nærmiljøet: Kva med å ta ein tur i nærområdet og plukke med dykk litt søppel før snøen kjem? Ikkje bare får ein bevegelse og frisk luft, men ein gjer også noko fint for både kloden og naboane sine. Det i seg sjølv er bevist å gjere oss gladare.

Ta eit måltid ute: Mat må me uansett ha. Så kvifor ikkje gjere noko ekstra ut av det, og invitere nokon med på eit måltid i det fri. Det treng slettes ikkje å bli gjort komplisert. Er du lei av pølser og pinnebrød, finn du inspirerande oppskrifter frå alle verdshjørner hos prosjektet Turmat frå heile verda.