– Me bestemte oss for at me skulle gå i lag og arrangere eit felles møte med Nome, ettersom dette er noko som råkar innbyggjarane i begge kommunane, seier ordførar i Midt-Telemark, Siri Blichfeldt Dyrland.

Møtet vil gå føre seg i Gullbring kulturhus torsdag 15. februar. Det vil bli halde innlegg av Blichfeldt Dyrland og av ein representant frå Telemark fylkeskommune. I tillegg vil togselskapet Go-Ahead og Bane NOR uttale seg. Det vil også vere ope for spørsmål frå salen.

Folk kan stille spørsmål

– Det er viktig å vise at me held trykket oppe, og at me ikkje gir opp, seier ordføraren og legg til:

– På tidlegare møte har det stort sett vore politikarar og administrasjonen som har tala saka for innbyggjarane, men no ønsker me at folk sjølv skal kunne delta.

Det vil bli opna for å levere inn spørsmål skriftleg, i tillegg til at spørsmål kan bli stilt direkte under møtet.

– Det er folk som er ute og opplever dette, og det er dei som er avhengige av eit godt togtilbod. Derfor er det viktig både at dei får si stemme høyrd, og at dei får informasjon om heile prosessen, seier Blichfeldt Dyrland.

Bra med direkte kontakt

Ordføraren legg til at ho trur det vil kunne ha effekt at togselskapet kjem tettare på kundane på denne måten, og at det blir direkte kontakt mellom dei.

– Dette er noko det så langt ikkje har vore moglegheit for. Men eg håpar at folk vil vise at dei vil la stemma si bli høyrd, og at dei ønsker å få tilbake dei ti stoppa som vart fjerna, seier Blichfeldt Dyrland, og avsluttar:

– Eg vil på vegner av både Midt-Telemark og Nome Senterparti seie at me håpar at folk tar seg tid til å komme, og at dei stiller spørsmål.