Midt-Telemark kommune slit med økonomien, og me kjem ikkje utanom å gjera kutt som gjer vondt. I arbeidet med å finna dei minst vonde plassane å kutta, så blir det også greidd ut om Folkestad skule skal leggjast ned.
Det kan vera faglege og sosiale argument både for og mot nedlegging av skulen. Me ventar på argumenta. Når det gjeld økonomien i dette, så veit me politikarar ikkje noko om det endå. Dette vil den pågåande utgreiinga seia noko om, og høyringsinnspela vil supplera dette.
Eg meiner det er riktig å vurdera om ei samanslåing av skulane er aktuelt. Men tempoet i tidsplanen er altfor høgt. Planen er at dersom alt går på skjener, så skal elevane frå Folkestad inn på Bø skule alt frå august i år. Dette er ikkje berre ein stor overgang for elevane på Folkestad, men også for ungane på Bø skule. Det blir store endringar i alle klassar på alle trinn. Elevane går ut i sommarferie utan å vita kven dei skal gå i klasse med til hausten, eller om dei framleis skal ha den læraren dei er glade i.
Ved overgang frå barnehagen til skulen er det eit stort arbeid med skulebesøk, fadderordning og anna innsats for å sikra ein god og trygg overgang. Ikkje noko slikt arbeid ligg inne i planen for rask samanslåing av skulane.
Det er eit særs stort arbeid som skal gjerast med planlegging av ein ny storskule. Det arbeidet må vel nokon gjera på overtid i sommarferien.
Tempoet i samanslåinga meiner eg er uforsvarleg. I kommunestyremøtet i mars bør politikarane endra tidsplanen før framlegget går på høyring. Etter høyringsrunden skal politikarane ta stilling til nedlegging. Dersom kommunestyret går inn for dette, og det er ikkje sikkert, så bør samanslåinga setjast i verk først i august 2025. Skulane, elevane og foreldra bør få eit år til å leggja planar, tilpassa lokale og få gjort overgangen så god som mogleg for alle.