Områdebanksjef for Midt- og Aust-Telemark i Sparebank1, Lars Gunnar Løvskeid, ved innbrotsstaden. Foto: Gro B. Røiland
Ein mann i 20-åra er pågripen, mistenkt for innbrot i Sparebank1 i Bøgata. Innbrotsalarmen blei utløyst klokka 04:30 natt til tysdag, etter at nokon hadde tatt seg inn gjennom eit vindauga ved hovudinngangen til banken.
Tre timar seinare kom meldinga på Twitter om at politiet hadde pågripe ein kar i 20-åra i Straumekrysset i Drangedal. Funn gjort i bilen tyder på at det er rett gjerningsperson.
I morgontimane tysdag visste ikkje områdebanksjef for Sparebank1 i Midt- og Aust-Telemark, Lars Gunnar Løvskeid, om tjuven har fått noko med seg. Banken er pengelaus, men innbrotstjuven skal ha tatt seg inn i rommet ved innskotsautomaten.
Delar av bankområdet er avsperra inntil politiet har gjort nærmare undersøkingar. Banksjefen opplyser at banken vil vera open for kundar som vanleg. Litt kjølegare enn vanleg blir det, inn til politiet har gjort det dei skal og nytt vindauga er tilbake på plass.