Annika blir program­leiar saman med kjærasten

– Eg kan gjere mykje, men eg nektar å gifte meg. Det er noko som er viktig for meg, og om det skulle skje ein gong så vil eg oppleve det på ekte. Eller … om me blei skilde i løpet av aksjonen, så kanskje, seier Annika Momrak.

100 timar galskap

Ho er ifølgje NRK ein av fire programleiarar i årets P3-aksjon. Då ventar det henne mange sprø utfordringar, den eine kanskje meir ubehageleg enn den andre.

P3 skal nok ein gong ta Noreg gjennom 100 timar med fullstendig galskap for å samle inn pengar til ei god sak. Den 16. oktober klokka 16.00 smell det heile i gong med utfordringar, forvandlingar og ukomfortable scener.

Medan det i fjor var 100 oppgåver som skulle løysast på 100 timar, går aksjonen litt tilbake til røtene i år, ifølgje statskanalen.

Anna Nor Sørensen (28), Henning Bang (23), Sindre Reinholt (29) og Annika Momrak (25) skal ha direktesending frå eit radiostudio i Trondheim, utan å ane kva som ventar.

Jobbar saman med kjærasten

Dei to sistnemnde får kanskje kjenne litt ekstra på det å sende radio saman i så mange timar, både på godt og vondt.

Annika og Sindre er nemleg kjærastar og har for tida eit avstandsforhold. Men det blir ikkje mykje avstand når dei to skal jobbe saman i 100 timar.

– Eg har sagt ja fordi eg må passe på Sindre, seier Annika til NRK.

– Det kan absolutt gå begge vegar. Det er ingen som kan irritere meg som Sindre, men det er heller ingen som kan trøyste meg som han. Men eg trur og håpar at me kjem sterkare ut av dette, seier ho.

Sindre kan ifølgje Annika vere vanskeleg å knekke, men ho trur han ville hata å for eksempel sitje åleine på ein stol i eit rom utan noko som skjer.

– Eg trur han hadde slite. Han er ein rastlaus fyr.

Første gong på radio

Annika er kjent for fleire programleiar-jobbar, blant anna i «4ETG» og «Melodi Grand Prix», og som figuren «Romvesenet» i «Maskorama». Du kan også snart sjå henne som programleiar for den nye serien «Dama til», som kjem på NRK TV i haust.

Dette blir hennar første år som programleiar for P3-aksjonen.

– Det er ei sak som eg kjenner at det er lett å engasjere seg i. Eg synest det er fint å få lov til å vere med på å samle inn pengar til ei så viktig sak som TV-aksjonen, seier ho.

Programleiarane har fått lov til å setje nokre grenser for kva dei absolutt ikkje vil gjere under aksjonen. For Annika er det å bli fridd til.

Annika var ifølgje NRK gjesteprogramleiar ein av dagane i fjor, men i år skal ho få prøve seg på å vere med i alle 100 timane. Ho seier at ho gler seg til å jobbe saman med dei andre radiovante programleiarane og til å kjenne på fellesskapet som ei slik sending gir.

– Eg er den einaste som ikkje har sendt radio før. Eg føler meg litt som ein praktikant i dette prosjektet, seier ho, og legg til at ho truleg også er den mest introverte personen i gruppa. 

Ho har ofte behov for å vere åleine og prosessere verda, men det blir det ikkje så mykje tid til under aksjonen.

Kan klikke i vinkel

– Det er eg spent på korleis eg kjem til å takle det. Eg er spent på om eg kjem til å klikke i vinkel på Sindre. Mest sannsynleg, seier ho.

Kjærasten til Annika er programleiar for radioprogrammet og podkasten «Pønsj» på NRK P3 og podkasten «Statens mal for medarbeidersamtale». I tillegg har han sin debut som programleiar for «P3aksjonen» i år.

– Eg har alltid hatt lyst til å vere med på «P3aksjonen». Det er ei kjempegod unnskyldning for å vere ein idiot. Eg skal berre gønne på, seier han til NRK.