Full jubel for kongane på haugen – nå er stafettpinnen gitt vidare
Nye og gamle kongar på haugen strålte i rampelyset, da grenderevyen var tilbake for fullt fredag kveld. Revyen tek pulsen på livet i kommunen, frå togtrøbbel til dårleg kommuneøkonomi og badande ordførar.
Ikkje sidan februar 2020 har me fått servert grenderevy, ein tradisjon som blei dratt i gang i Bø for 30 år sidan og som har blitt arrangert årleg fram til koronapandemien. Langkåshaugen har denne gongen mobilisert om lag 60 personar til revyen, og med på laget har dei Ann Cahtrin Haugland Andersen på regi og band leia av Torgeir Hefre.
Fredag var det premiere på «Kvar gong kongane møtast». Det blei suksess, med varm og entusiastisk mottaking frå fullsett sal. To utselde hus vitnar om at revyen har vore sakna.
For det er noko befriande fint i det å få liv og politikk i kommunen filtrert gjennom revyen sitt skeive, humoristiske blikk. Den oppgåva har revygjengen frå Lankåshaugen tatt på alvor.
Fine parodiar
Annonse
Vår badeglade ordførar er parodiert, og det opp til fleire gonger. Parodiert er også listetoppane Ingemar Bråten, Karin Hagen og Bjørn Magne Langkås, samt Senterpartiets Chase Alexander Jordal. Borgar Kaasa dukkar også opp i ei vilter utgåve av seg sjølv med ordførarkjede og rett til å vie folk.
Assisterande kommunedirektør og kommunedirektør er også med, svært tett samanbunde, i eit innslag med meir eller mindre ubegripeleg utgreiing om kommuneøkonomi, rammekutt og ressurspoolar.
Revyen har mange perler om livet elles i kommunen, som sketsjar frå legesenteret sitt venterom, reklamefinansiert offentleg toalett i sentrum, songen om burgeroverfloden og det nye blokkfløytebaserte rocksamfunnet på Langkåshaugen, Blokkrokk.
Musikk og song er det mykje av gjennom heile revyen, og det er gøy å sjå at alle er med, frå små prinsar og prinsesser til godt vaksne kongar og dronningar. Kongane har skrive lokale songtekstar, noko som er flott. Til tider er det vanskeleg å få med seg det som blir sunge, noko som gjer at ein fort kan gå glipp av gode poeng.
Nye og gamle revystjerner
Det store med grenderevyen er fellesskapet den skaper i grendene, kreativiteten den får fram og at alle som vil kan vera med. Det er ein verdi større enn underskotet i kommunebudsjettet.
Sjølv om det etter opphaldet satt langt inne, klarte heldigvis Langkåshaugen å få liv i grenderevyen igjen. Borgar Kaasa skal ha ekstra heider og ære for å ha bidratt til å masa den i gang igjen. Det er moro å sjå Borgar, Langkåshaugens eigen revykonge, stråle på scenen igjen, side om side med gamle revytravarar og nyoppdaga revystjerner. Blant nykomarane er Margit Ims, som er kosteleg både som ordførar og syngande hamburger.
Neste grend ut i revystafetten er Eikjabygda. Dermed er revyansvaret tilbake der det starta for 30 år sidan.
