– Ha det bra til sykkelbygda

Sjå for deg dette: Midt-Telemark kommune vart over natta ein søkkrik kommune, la oss seie det, heilt monstrøse mengder pengar. 

Berre følg meg her. Fortetting av sentrum hadde vorte til skyskraparar på kvar side av gata. Ruvande bygg med heis og resepsjon, med lampar i krystall og golv av marmor. Bygga hadde fått flotte tilnamn, til dømes Sønstebø Tower og Almankås Residens. Utsikt til Lifjell? Det er berre å gløyme. Berre dei som likar å gå toppturar eller bur heilt øvst i Breisås sør hadde sett noko til den.

Parkeringsmoglegheitene i sentrum hadde det vorte verre med, dei var alle opptekne av lange limousinar, som treng to parkeringsplassar kvar for å få plass. Rike folk køyrer limousin, det veit alle. Ha det bra til sykkelbygda.

På kommunehuset sat kommunestyret og åt hummer-bisque (for kven et suppe eigentleg?) og klekte ut nye finansierings- og investeringsmoglegheiter. Investere i utlandet, eiga gate i London kanskje? Eller her heime, kva med sjølvkøyrande bussar på tvers av kommunen, ei kopi av Eiffeltårnet midt i sentrum eller helikopterflyplass på Lifjell? Moglegheitene er mange med milliardar på bok.

Alle dei folkevalde skulle vere kledde i dyre dressar og flotte kjolar, og på føtene, lakksko sjølvsagt. Det som er dumt med lakksko er at dei ikkje er eigna fottøy for vinterføre. Utruleg glatte! Så det hadde dessverre vorte ein del sjukemeldingar og krykker der.

Bø blad hadde gjort eigne investeringar i takt med den økonomiske situasjonen i kommunen og fått sin eigen TV-kanal for å distribuere nyhende, mest om finans. Alle nyheitssendingane hadde stilig vignett, og sendingane var fulle av dronebilete og helikopterlyd i bakgrunnen.

Eller, skulle me berre ha flytta heile kommunen til Sveits?!

Knips-knips! Vakne! Hallooooo.

Å akk, ein kan drøyme. Og det er jo langt frå dette me vil. Takk og pris for god utsikt til fjellet, eit mål om at fleire skal sykle og folkevalde med gode sko. Så får me heller tole at det er litt mørkt på Gullbring.