Ein aktiv professor emeritus
Per Mangset har stått sentralt i arbeidet med å etablere kulturpolitisk forsking, og har gjort det gjennom undervisning, artiklar, rapportar og bøker. Boka hans om sport er den som blir mest referert til internasjonalt.
Per Mangset har eit humoristisk og slåande ord til det meste. Han kjem frå Skarnes i Sør-Odal. Skarnes er både ein tettstad, ein poststad og ein gard, og på den garden er Per fødd og oppvaksen. Ei gammal tante åtte garden, men faren til Per var forpaktar og dreiv bruket. Hans eigentlege jobb var å styre eit innkjøpslag som selde gjødsel og landbruksmaskinar.
