– Me kan ikkje fortsetje med krisepakker til alle og ein kvar

Nå må me slutte å klage og syte, me som bur i verdas tryggaste og rikaste land. Me må slutte å vere sjølvgode og synest synd på oss sjølve. Me må stikke fingeren i jorda og sjå kva folk er opptatt av elles i verda, her me sit på berget og akkar oss over manglande koronastøtte til ditt og datt, høge straumprisar og dyr bensin. Og det gjer me attpåtil med både dobbelt opp av hus og hytter, to og tre bilar i hushaldninga og matvareprisar som ikkje akkurat tek bort brorparten av inntekta vår. Den brukar me nemleg på fritid og luksus – i alle fall dei fleste av oss.