Ruth Wilhelmine Meyer, Tuva Syvertsen, Per Anders Buen Garnås og Knut Buen er nokre av namna knytt til årets tingingsverk og Borgjakonsert. Opningskonserten i Gullbring fredag kveld er tilbake i kjent stil.

Svenske Väsen, internasjonale Celtic Roots Ensemble med mellom andre Tuva Syvertsen og Knut Reiserud, kvedaren Øyonn Groven Myhren og kurdiske Mizgin er nokre av musikarane ein kan høyre på opningskonserten.

Sjølve opninga blir i år ved festivalens styreleiar Marit Svalastog. Jubileet blir markert med blikk både bakover på festivalhistoria og framover.

– Det er lov å skryte litt når ein feirar jubileum. Det er ingen automatikk i at ein festival kan halde på i 30 år, seier festivalsjef Kristoffer Mosfjeld.

Telemarkfestivalen slår på stortromma i år med tingingsverket, som med tilskot frå Kulturrådet blir ein større og meir påkosta produksjon enn vanleg.

Oppdraget har i år gått til vokalkunstnar og stemmepedagog Ruth Wilhelmine Meyer, opphavleg frå Vinje. Ho byggjer verket rundt middelalderballada Haugebonden, ei folkevise ikkje minst Agnes Buen Garnås har gjort kjent.

Meyer har med seg Espen Leite, trekkspel, Tuva Syvertsen, fele og vokal, Per Anders Buen Garnås, fele, og ungdom frå Telemark folkemusikksenter sitt talentprogram for folkemusikk og -dans. Kyrre Heldal Karlsen og Silje Onstad Hålien står for scenografi, lys og regi.

Den tradisjonsrike Borgjakonserten er i år lagt til Bø kyrkje. Tema  for konserten er spelemann og komponist Torkjell Haugerud (1876-1954) og dirigent og komponist Olav Kielland (1901-1985).

Knut Buen og Tor Johan Bøen skal i tonar og ord fortelje om Haugerud og Kielland, deira liv, virke og samarbeid. Bøen, som er fiolinist, har med sin styrkekvartett Fragaria Vesca.

Les meir i papiravisa eller i e-avisa.